機師部落

又搬喇, byebye喇blogger!!!

2006-06-04T01:08:00.000+08:00

雖然blogger真係幾好, 圖片又可以無限upload, 不過明日報轉左2.0 version, 真係好左好多, 所以都係轉返過去...又由頭o黎過...

新blog在此:
http://mypaper.pchome.com.tw/news/pilotdream/

亞洲新星導 - 得閒飲茶

2006-06-02T00:54:00.000+08:00

由劉德華成立o既映藝娛樂有限公司, 一手策劃o既"亞洲新星導"計劃, 集合幾位亞洲區新晉導演, 拍六部題材唔同o既華語電影。而"得閒飲茶"就係其中o既第一擊。由林子聰執導, 方力申, 梁慧嘉主演。導演同男女主角都一樣係新人, 係咁o既市道仲可以用呢個組合去開一套戲, 劉德華先生真係藝高人膽大。

話明係"亞洲新星導", 焦點當然落係導演身上。睇左一d資料, 林子聰比起計劃裡面其他人, 導演資歷應該係最淺o既。其他人好似台灣o既李芸嬋, 馬來西亞o既何宇恆, 其實佢地都有一定o既經驗, 甚至香港另一代表黃精甫就已經導過兩部大製作。所以"得閒飲茶"可以預期係當中最幼嫩o既一部。而事實亦顯示左林子聰有好多進步空間。

作為一個新導演, 自然有好多野想做; 尤其係一個唔知仲會唔會有下一部戲o既導演, 就自然會將呢d想做o既野, 把握機會一次過做哂。導演分別將好多場戲都用左漫畫式誇張法, 而且配以唔同o既動畫效果, 有幾幕真係會覺得幾得意, 但係之後越來越多就會覺得有d厭。另外一鏡過長鏡頭又係新導演情意結, 但係同一組長鏡頭先後拍兩次就唔係咁好睇囉, 可能想帶出兩次對話o既分別, 不過效果麻麻。

演員方面, 方力申同梁慧嘉都算係咁, 自自然然, 唔會太過做作。林家棟就冇得傾啦, 實力派就真係實力派。客串演出o既劉德華好有驚喜效果, 分別飾演愛情監獄o既獄卒及大隻佬囚犯, 其中大隻佬成日唱住"暗裡著迷", 真係冇得頂。

成套戲有好多金句, 其中有好多都係平時好想講, 但又冇咩機會(唔敢)講, 所以套戲缺憾唔少, 不過睇o個時其實幾enjoy o架!!

188鐳射傳音: $55

Munich 慕尼黑

2006-06-01T01:42:00.000+08:00

以巴問題係一個點拍都會俾人鬧到飛起o既題材, 偏向任何一邊, 就會俾另一邊炮轟; 不偏不倚, 就會被兩邊一齊鬧。不過史匹堡夠膽色, 唔理街外人點鬧, 結果拍左一套好好o既電影出o黎。

"巴勒斯坦恐怖份子殘殺以色列運動員, 以色列派出特工作出暗殺報復。" -- 成個故事就係咁多, 中間發展並唔算曲折, 不過就帶出左好多訊息。片中冇判斷究竟邊一個係好人壞人, 每個都係為左國家民族去抗爭。

其實有留意國際局勢o既人都知道中東問題係一個幾乎冇可能解決o既問題, <慕尼黑>係傷口上o既鹽, 定係暫時安撫心靈o既藥呢?

widesight: $129

The Da Vinci Code 達文西密碼

2006-05-31T02:07:00.000+08:00

冇期望就唔會失望, 呢句說話絕對冇錯。好早之前睇左原著, 已經覺得Dan Brown並唔係咁有料, 只係佢比其他人勇, 敢將天主教拎o黎賺錢。而家THE DA VINCI CODE終於拍成戲, 應該都代表左呢個熱潮o既終結。

除左部分劇情刪減左之外, 成套戲都真係幾忠於原著, 連一d我覺得冇需要拍出o黎o既鏡頭都拍埋出o黎, 例如一開始羅浮宮館長被殺一幕, 根本就可以cut左佢啦。中間又要穿插d古代片段, 搞到好似轉左去睇discovery channel咁。後段交代身世又改左d, Sophie個兄弟又冇交代, 又安排左場Priory哂馬, 老土到爆。最尾Robert跟住條子午線搵到真正石棺o既時候, 又要zoon到落地底影埋副棺材, 畫公仔畫出腸, 真係吹漲。

導演Ron Howard都算好野, 將一個口水多過茶o既劇本拍到冇咩冷場, 算係有交代。Tom Hanks就慘d, 個角色其實冇乜可以發揮, 而且個髮型真係核突得緊要。Audrey Tautou好似係第一次拍荷里活製作, 可能係我主觀啦, 我覺得佢冇左係其他戲裡面o個種光芒, 又可能係因為要佢講英文, 所以個感覺麻麻地。奸角由Ian McKellen去演, 比起佢近年來比較出名o既其他角色(X-MEN裡面o既Magneto, 魔戒裡面o既Gandalf), Leigh Teabing明顯比較失色喇。

其實The Da Vinci Code咁紅, 可以考慮拍返ROBERT LANGDON第一故事, ANGELS & DEMONS。起碼個故事緊湊好多, 又有高科技, 又有連環殺人, 仲有ROBERT表演幾千呎高空跳直昇機唔死得, 一定好睇過The Da Vinci Code啦。

Gathering @ 5/27/2006

2006-05-28T19:43:00.000+08:00

又係ive同學聚會, 地點係東大門韓燒。今次都好齊人, 除左臨時甩底o既史提芬同埋永世唔蒲頭o既史東之外, 其他人都到齊。包括雷文, 雷文夫人, 文西, 積高, 大佬民, 艾特蒙, 小迪迪, 丙丙, 仲有本來詰唔o黎, 臨時又趕得切o既JOEMAN (AKA: UNEXPECTED JOEMAN), 連埋我就o岩o岩好十個人。

講返間東大門, 雷文話做過research話幾好食, 不過實情就係差過壯陽丸。飲品得清茶, 其他野飲都要加錢。料又冇咩特別, 甜品又少(接近冇), 最慘係埋單價錢同壯陽丸差唔多, 而且服務態度惡劣, 一夠兩個鐘就趕人走, 以後都唔會再去。

之後去左間吧飲野傾計, 傾傾下文西開始同雷文玩一個類似真心話o既遊戲, 跟住參予人數越來越多, 而人氣極盛o既雷文就梗係變成眾矢之的啦。咁我地問o既問題都唔係話好尖銳o既, 不過條友茅到震, 成日用埋d無菱兩可o既答案。玩下玩下, 本來諗住淨係飲杯pink lady就算, 最後都飲多左幾杯啤酒...

屈到病

2006-05-25T00:48:00.000+08:00

天氣又熱, 又濕, 又焗, 結果又病...

咳到想死, 喉龍又痛, 仲鬼死咁多野做...

買左munich同walk the line, 好想睇...不過冇精神睇...好痛苦...

Our Time Has Come - 何韻詩

2006-05-22T00:17:00.000+08:00

HOCC

新碟

好聽

好睇

正

GoodFellas 盜亦有道

2006-05-19T23:24:00.000+08:00

真人真事改編, 唔好期望會出現義氣呢樣野, 英文片名GoodFellas (好兄弟) 亦只係一種諷刺。封面見到ROBERT DE NERO企中間, 唔好俾佢呃到, 主角係左手邊RAY LIOTTA。

如果嫌杜琪峰o既"黑社會"唔夠真實, 呢套一定可以滿足到你。

widesight: $79

Once Upon A Time In America 義薄雲天

2006-05-19T00:17:00.000+08:00

終於拎得返隻碟, 箇中滋味實不足為外人道。雖然已經變左三手(p.s. 冇打錯, 係三手, 唔係二手), 不過我仍然咁興奮, 因為真係好好睇。

片長差不多四個鐘, 相信有好多人都會覺得悶。而事實上以現今電影尺度量度, 有好多場戲係"多左d"。不過凡事換個角度睇下, 而家d電影係唔係"少左d"呢, 始終唔係咩戲都可以用兩個鐘就做得哂, 就算做得哂, 又係唔係真係咁好睇呢。

可能有人睇完會話, 世上邊有d咁義無反顧, 咁為朋友o既人ga? 我都相信係冇, 不過做戲嘛, 況且又真係拍得好細膩, 好易投入, 四個鐘話咁快就過。

widesight: $89

莫札特百分百

2006-05-18T03:05:00.000+08:00

之前出過隻包裝得好靚, 又好好賣o既"莫札特效應", 不過冇買, 因為貴。而家EMI唔知發咩神經, 出左四款"百分百"系列CD, 分別為鋼琴, 歌劇, 古典, 莫札特, 款款都係標榜6CD, 100個TRACK, 最緊要係單碟價呀! 結果拎住"鋼琴"同"莫札特"考慮左良久, 都係揀左莫札特。

忽然之間, 個人都好似HIGH CLASS左。

大眾書局: $99

有K唱

2006-05-16T21:17:00.000+08:00

又有K唱

出席人士:SERENA, MANDY, JANE, KEVIN & 我
地點: 港晶NEWAY

1) 七點開始唱到兩點, 差D以為真係會唱到天光
2) CHOCOLATE MOOUSE冇上次咁濃, 不過CHEESE CAKE呢次好正, 黑森林就普普通通。
3) 竟然有即製蛋包飯, 驚喜。
4) SERENA都係唔唱歌。
5) MANDY仍然快閃。
6) 唱左好多舊歌, 諗起好多野, 搞到我好似好老咁。
7) 有人竟然覺得我大過KEVIN...
8) 雖然佢個樣真係呃到好多人......
9) 其實我仲係好後生o架.........
10) 最開心係終於唱到Eason版本o既情誡!!

The Terminal 機場客運站

2006-05-15T00:44:00.000+08:00

第一次聽見呢套戲o既故事, 第一個反應係"WTF!!" 咁荒謬!!", 跟住有人話我知現實有類似情況, 我個反應都係"WTF!! 咁荒謬!!"。世事原來真係可以咁荒謬。

TOM HANKS再次表現出影帝o既風範, o個d東歐口音o既英文真係冇得彈, 肢體動作一流。CATHERINE ZETA-JONES仲一流, 因為咁多年都仲係咁靚女, 演得又唔差, 果然係我NUMBER 1女神。編劇好抵讚, 冇渲染二人o既感情線, 冇將佢地o既感情童話化, 即係好似SPIELBERG咁講, 係"LIKE STORY", 唔係"LOVE STORY"。聽聞原本有另一個結局係VIKTOR最後可以同AMELIA一齊, 非常慶幸最後冇用到呢個結局。

TWO DISC EDITION, 好抵睇。DISC1 唔駛講, 好戲一套; DISC 2 o既special feature基本上都應該要睇哂, 尤其睇下個機場點樣搭出o黎都過癮。

HMV: $79

Goodbye Alice in Wonderland - Jewel

2006-05-11T00:42:00.000+08:00

Jewel - 樣靚, 識創作, 唱得好, 條件真係無敵。不過有時年輕得志並唔係一件好事, Jewel 21歲第一張唱片已經係佢人生o既最高峰, 淨係美國本土累積銷量都超過1100萬。第二張都仲有600萬張, 但之後就以極速下滑, 對上一張"03/04", 轉歌路救亡, 但搞到唔三唔四, 結果只係賣左70幾萬。

2006年, Jewel終於交出呢張"Goodbye Alice in Wonderland" -- 自"Pieces of You"之後另一張自傳式唱片。亦係Jewel o係atlantic record最後一張唱片, 甚至有人話可能係佢人生最後一張唱片。不過"Goodbye Alice in Wonderland"實在係一次winning return, 況且Jewel只係32歲, 仍然樣靚, 識創作, 唱得好, 咁o既人才點會咁易沉呀。

牛一有飯食 @ 茶軒

2006-05-11T00:04:00.000+08:00

某日serena講起威廉就快生日, 而本人都係就快生日(呢次真係叨威廉o既光), 所以決定o黎一次飯聚。地點係茶軒@翡翠明珠, 出席人仕有我, 威廉, mandy同serena。

講真, 我覺得麻麻地抵食, 除左個"風沙雞翼"同"花支球"真係幾好食之外, 其他野都真係麻麻地, 威廉叫o個個無錫排骨飯, 個排骨冇咩問題, 不過碗飯真係細就可憐; mandy o個碗酥炸排骨飯就大碗得滯。肚絲同豬耳都係一般貨色。不過四個人一路食下野又一路講下野(都係講下人是非啦, yeah~), 食物質素又唔算真係咁大問題o既。

今餐serena請客, 多謝哂!! mandy 請o既cheese cake, 好好味, 都多謝哂~

Keys To The World - Richard Ashcroft

2006-05-10T01:45:00.000+08:00

The Verve係芸芸咁多英國band之中, 都算係最經唔起壓力o既一隊, 頭兩張album都唔賣得, 樂隊上下都冇放棄, 點知到"urban hymns"紅到爆燈, 紅得滯反而令樂隊崩潰。

不過作為主音兼結他手o既Richard Ashcroft就繼續風光, 2000年同2002年分別o既solo album都大賣, 今年一月再發o既呢張Keys To The World, 銷情都一樣火熱, 而且質素仍然上乘。

信和價: $80

飯聚 @ Daisy

2006-05-10T00:59:00.000+08:00

唔係文西帶路, 都唔知女人街有間價錢中上o既西餐廳..."DAISY"。

一睇個MENU, 以旺角o黎講都算幾貴, 尤其隔離左右都係一d 日式西餐, 幾十蚊有個set dinner...而家百幾蚊個dinner, 都幾貴。

湯: 紅腰豆忌廉湯, 幾好飲~ 不過同普通忌廉湯冇咩分別。

頭盤: 煙三文魚沙律配日式芥末汁, 三文魚冇乜味....

主菜: 燒海斑配菠菜意大利飯, 燒海斑應該係冇調味o既...個意大利飯就好重牛油味, ok啦。

甜品: 有成十款俾我揀, 好頭痛。揀左"心太軟焗朱古力布甸, 一篤佢裡面d朱古力就漏哂出o黎, 不過真係好好食。

真係多謝哂文西請客, 文西真係好, 文西真係我好朋友, 文西總之好啦~

Pride & Prejudice 傲慢與偏見

2006-05-09T00:49:00.000+08:00

1) 我沒有看過原著, 對這一部英國名著被濃縮成兩個小時沒有意見, 反正片子好看。

2) 導演Joe Wright手法熟練, 尤其處理兩場舞會時的長鏡頭, 很精彩。

3) 聽聞原著裡, Jane(大姐)是最美的, 但戲裡Lizzie實在美得多...

4) 戲裡的場景, 除了第一場的舞會大堂, 全都是實景啊, 包括幾間夢幻般的大屋。

5) Donald Sutherland仍然好戲, 聽聞導演看了他在Cold Mountain裡的演出而想起了父親, 所以就請他演了Mr. Bennet。

6) Alternate US ending雖然甜蜜, 但總覺得畫蛇添足, 還是正片裡那個結局比較好。

widesight: $129

Closer 誘心人

2006-05-05T19:23:00.000+08:00

正如時代雜誌影評所講一樣 -- "At last, a love story for adults."。

另外, 電影的tagline很有意思 -- "If you believe in love at first sight, you never stop looking", 中譯應係是: 如果你相信一見鍾情, 你就會不停張望。

現代愛情就是不問對錯, 就是殘酷。

床頭歌

2006-05-05T14:36:00.000+08:00

被Q Magazine選為50 bands that changed the world 第三位, 如果Kurt Cobain唔打爆自己個頭, Nirvana應該唔會到今日仲係咁紅。不過Nevermind真係一張極之出色o既唱片, 而家再聽都唔會覺得係15年前o既產品。
HMV: $89

唔知係Thank You帶紅左stan, 定係stan令人注意到thank you裡面把女聲, 總之Dido就係咁紅左。因為唱片公司內部問題, No Angel首先o係美國登陸, 之後隔左一排先用Enhance CD形式o係英國發行, 不過魅力依然, 全球銷量1350萬。前兩年o係旺角某無良鋪頭仔, 台版都標價$120, 哼! 我而家買到正宗英國版呀!!
HMV: $79

Brokeback Mountain 斷背山

2006-05-05T00:46:00.000+08:00

斷背山橫掃所有電影節/頒獎禮, 李安亦終於奪得奧斯卡最佳導演。我個人對李安從來都沒有好感, 甚至有些討厭。不過我還是看了他差不多所有作品, 也包括了斷背山。事實上, 斷背山也真的拍得很細膩。

故事: 故事發生在1963年荒僻的懷俄明州，Ennis (Heath Ledger)以及Jack(Jake Gyllenhaal)受僱於一個牧場場主，一個夏天的相處竟燃起了意想不到的愛火。牧羊的工作結束，但分離並沒有阻隔二人的感情。然而，當時社會不但歧視同性戀更會暴力相待，為了保守秘密，兩人只好各自結婚生子，埋藏心底秘密。直至4年後，Jack與Ennis於懷俄明州重遇，一段埋藏的愛火重燃。為了逃避世俗眼光，兩人相約每年一度在斷背山碰頭……

Heath Ledger做得內儉, 滿口鄉音, 看得出下過一番苦工。Jake Gyllenhaal就仍然不羈。兩人的感情很含蓄, 不過細節上處理得很細膩, 最後Ennis找到了Jack藏起的恤衫, 就是很早之前埋下的伏線。兩人分手後各自的家庭生活, 反而更好看。Michelle Williams飾演Ennis的妻子Alma, 看見自己的丈夫跟一個男人擁吻, 從啞忍到決定離婚, 離婚之後仍然放不下, 中間每一個過程都發揮得很好。相反飾演Lureen的Anne Hathaway就比較失色, 但最後透過電話猜到真相時的表情, 做得很好。

斷背山的製作水準真的很高, 演員也發揮得很好, 音樂攝影都很動人。有很多人看得感動, 但我卻找不到共鳴。

飯聚 @ Italian Tomato Cafe

2006-05-05T00:03:00.000+08:00

忽視一晚華姐話:"星期三食飯, 7點, 旺角", 就係咁星期三就又有聚會, 地點係朗豪坊ITALIAN TOMATO CAFE。出席人士有華姐, HELEN, SERENA, BOYEE(第一次見, 第一代人), WILLIAM同埋我。

都幾抵食, 68蚊有湯有包有意粉有CAKE有咖啡, 不過係自助形式, 即係好似星巴克咁, 等我仲坐低問點解冇MENU...OTL...正一大鄉里。意粉我叫左o個個忌廉吞拿魚意粉, 好似我自己煮果d好食過佢, 不過味道都ok啦。CAKE就要左我最愛o既new york cheese啦, 不過死蠢, 一早就拎左返o黎, 又隔左半個鐘先食, 到食o個時都開始有d溶。件cake d奶味多左d, 比平時食開(都係italian tomato)果d差左少少, 早知食chocolate moose啦。

我地一路食一路講, 華姐就同helen & boyee佢地講下份travelling plan(有得去旅行, 真好...), 中間大家又講下人是非(i like it!!), 傾到人地打佯趕我地先肯走, 走左仲要係朗豪坊門口繼續傾多半個鐘之後先散, 傾得好高興。

不過就有條友(係話你呀, 唔駛望第二個喇)成晚都唔出聲囉, 好心你就出下聲啦, 如果唔係真係唔識同你溝通呀, 又或者係你不屑同我呢d低能仔講野啦...

放假中

2006-05-04T01:25:00.000+08:00

我係放緊假o既, 至少都去到5號。

咁點解仲有人打俾我問工作o既野呢?

咁點解仲有人email o黎追我幅圖, 仲要我呢個星期俾佢呢?

結果我就要繼續上網搵資料

結果我又要繼續畫個floor plan

真係要claim佢ot....

黑社會 2 -- 以和為貴

2006-05-02T00:07:00.000+08:00

之前<黑社會>壓過<如果.愛>奪得最佳電影, 氣勢之盛, 一時無兩。續集強勢上映, 焦點再次集中於社團因選話事人而內訌, 橋段就更加血淋淋, 肢解碎屍, 應有盡有。

今集基本上由古天樂由頭帶到尾, 少左上集兩雄雙爭o既緊張戲劇性。古天樂做戲其實幾好, 不過仲未有一套戲可以令佢真正咁爆出o黎, 雖然今次佢都做得唔錯, 不過都只係保持水準, jimmy仔其實係一個悲劇角色, 亦係片中最大o既輸家。任達華戲份比上集少, 不過都係主要人物, 內儉但係心狠手辣, 佢d身體動作同眼神都做得好好。今集多左鄭浩南演殺手, 貪錢就係好有型格, 印象幾好。其他人好似張兆輝, 林雪, 林家棟, 張家輝都冇咩發揮機會, 尤其張家輝行路都仲係要行到好似劉德華咁, 太造作。

最惹人談論o既係狗場一段戲, 但其實畫面表達唔多, 不過意識上就真係好血腥, 而且有一種令人心寒o既感覺, 帶出jimmy仔心狠手辣o既一面, 亦係片中最吸引人o既一段。最後公安副廳長o既一番說話就明顯有強烈諷刺性, 內地政府唔信任選舉, 龍頭都要佢地欽點, 仲要冇得唔制, 穩定壓倒一切。情況就好似中央管理香港手法一樣。

"以和為貴"比上集少左寫實感, 又少左梁家輝壓陣, 成績難免比上集失色, 不過仍然不失為一套好戲。而slogan"黑社會都有愛國'就成為全片最大o既引子。

天生一對

2006-04-30T19:44:00.000+08:00

楊千嬅加任賢齊, 票房靈藥加票房毒藥, "花好月圓"之後都對呢個組合冇咩期望, 不過"天生一對"令我有d改觀。導演羅永昌為杜琪峰不少力作做過執行導演(鎗火, PTU, 黑社會...等等), 亦經常於杜琪峰作品裡面客串演出。呢次坐做導演, 票房成績不過不失, 不過套戲其實幾好睇。

故事: 廣告公司創作總監Bingo一晚她在酒吧內遇上專科醫生的V仔，兩人纏綿之際竟被V仔意外發現Bingo乳房有硬塊。結果醫生證實她患有乳癌，Bingo 大受打擊，深恐自己失去一個乳房，一定沒有男人再愛她，結婚機會就此煙滅。焦急的Bingo遊走大街小巷，尋遍各種隱世醫術，但結果令她啼笑皆非。而V仔經常利用各種方法鼓勵 Bingo，二人由鬥氣冤家變成互相開解的知己。既要面對公司內的激烈競爭，又要排解好友間的感情紏紛，Bingo苦惱非常。面臨是否進行手術的抉擇，Bingo 對愛情與人生也得到一番全新體驗。

故事改篇至西西o既"哀悼乳房", 但其實只係拎左個概念, 故事係岸西原創, 之後再由馮志強編劇。以乳癌作為題材, 想帶出要以積極態度面對人生低潮, 正如片中slogan一樣: "用最好的心情, 擁抱最壞的事情"。但係有一個問題, 就係片中有幾處都拍到好似政府宣傳片咁。楊千嬅今次演女強人, 角色比較貼近現實, 唔駛睇佢擠眉弄眼o既誇張表情, 對佢或者觀眾都係一件好事, 今次演出算合格有餘。反而任賢齊冇咩突破, 都係一個好男人, 呢類型角色佢演左無數次, 其實真係有d厭。最好睇係一眾綠葉, 銀河影像一班熟口熟面o既班底, 好似林家棟, 張兆輝, 許紹雄等等, 戲份唔多, 不過始終有戲味。另外久違o既賈思樂做女人型做得好生, 令人眼前一亮。

SPECIAL FEATURES例牌有making of, 刪剪片段(唔睇都冇所謂), ng片段(得分幾鐘...)同埋mv, tv spot, trailer等等。仲有個clip係"乳房的健康指引", 不過我就真係冇咩興趣。

widesight: $69

Just Like Heaven 天國可人兒

2006-04-27T17:08:00.000+08:00

市場永遠都需要呢類型o既愛情喜劇, 觀眾唔需要理會劇情犯唔犯駁, 唔需要用腦, 開開心心睇完就算。

故事: David(Mark Ruffalo)在三藩市租下一座新房子，打算舒舒服服地享受其寡佬生活。豈料，屋內卻突然出現一個女人！她叫Elizabeth(Reese Witherspoon)，經常神出鬼沒，而且蠻不講理，硬說房子是她的，還勒令David執包袱走人。雖然Elizabeth是個金髮美女，但David一口咬定：她是白撞！更靜靜雞換鎖換閘，可是Elizabeth依然出入自如??David開始懷疑Elizabeth根本不是人！Elizabeth是位急症室醫生，一日做足廿四小時不眠不休，工作過度狂熱，就連自己被車撞了昏迷在醫院也不察覺！結果，人在昏迷，靈魂離體在家中彌留?…David開始同情她的遭遇，決定替她找出一條正確的「死」路。誰知兩人日久生情，陰差陽錯地愛上對方，還天真地計劃將來??但事實是，時間經已無多！要延續人鬼情未了，究竟如何是好？

個人非常喜歡Reese Witherspoon, 客觀d講佢唔係特別靚, 不過就真係好鬼死吸引。所以DVD出左咁耐我就侯住咁耐, 諗住等佢跌價, 點知又係耐性敵不過時間。人鬼情未了珠玉在前, 再拍人鬼戀而要引起觀眾興趣, 真係一件唔易O既事。不過以人鬼戀去包裝一個簡簡單單o既愛情喜劇, 就一定可以討好好多人。

事實上成套片拍得工工整整, 唔撚鏡頭唔賣特技(僅有o既特技仲要幾劣...), 但又令人睇得舒舒服服。Reese Witherspoon做返個比較現實o既角色, 唔駛下下好似Legally Blonde裡面d舉止咁誇張, 表演唔算好突出, 不過笑起上o黎都仲係好甜。Mark Ruffalo飾演同佢"爭"屋o既David, 就全程保持傻傻戇戇喜劇感, 算係做到本份。

special features都係d例牌野, deleted scene就真係好彩佢delete左, 因為有幾場真係幾無謂兼核突(尤其係resse吊威也o個幕), 另外o個個alternate ending都唔知係唔係為左出dvd先拍o既。ng片段幾好笑, 仲有演員訪問, making of。

節拍: $129

犀照

2006-04-22T19:15:00.000+08:00

驕陽電影公司(就係個logo明抄vodafone o個間)o既頭炮。作為香港電影支持者, 好開心仲有新電影公司肯開戲, 不過套野四平八穩, 唔算突出。

首先, 馮德倫o既配音好難聽, 唔明點解唔搵返佢自己配。阿嬌做戲已經比以前好左好多, 不過都仲係唔夠好。黃浩然越做越奸, 不過越奸就越好睇喎, 佢都係疊埋心水做奸人吧啦。犀照o既製作水準其實唔差, 特技, 場景等等都有中上水準, 不過就係衰在一個字: 悶。片長90min, 不過仍然覺得推進緩慢。劇情方面其實都幾老土, 不過加左d懸疑成份, 大玩民間冤案, 可以話有返d中國式鬼故味道, 近年比較少有。較可取係某d細節度得幾好, 不過主線就太公式喇, 而且女大狀無端白事竟然會愛上受屈藥商, 有d夾硬o黎。

驕陽電影o黎緊仲有兩套大片, 分別係劉華o既"墨攻", 原著小說好好睇, 唔知出o黎個效果會點。另外就係搵銀河影像拍o既"跟蹤", 掛得杜琪峰個名, 應該都唔會差掛。

widesight價: $79

頭文字D

2006-04-22T00:30:00.000+08:00

想買好耐, 不過嫌貴冇買。結果耐性耗盡, 價位企硬, 咁我唯有向現實低頭。

初初聽聞有人會拍頭文字D, 真係有D驚。五連髮夾灣, 點拍呀!? 結果係真係拍到o既, 雖然用鏡頭就左好多位, 不過出o黎效果幾好。飛車特技非常掂, 尤其劉偉強set到個攝影機鬼死咁近, 真係做到o個個壓逼力。

改篇出o黎個故事已經算唔錯, 幾個主角外型都算神似。周杰倫真係好好運, 第一次拍戲o既角色唔駛演技都可以做到神似。陳冠希夠靚仔有型, 同涼介又真係好match。陳小春同須藤京一簡直就係一模一樣。不過最似最似都係鈴木杏飾演o既夏樹。

DISC 2係Special Features, 都好多野睇, BEHIND THE SCENE同MAKING OF再加人物角色介紹都要用幾耐o黎睇哂。DELETED SCENE一段過, 冇得分段播, 不過其實o個d片段無關痛癢, 唔睇都唔緊要。仲有一段上海賽車場飄移試範, 都幾神乎奇技。仲有一段片段, 係用CG動畫模擬幾場飛車場面(即係好似CG STORY BOARD咁), 雖然CG水準唔高, 不過我覺得幾得意, 最詭異o既係ROOT MENU係ACCESS唔到去呢段片o架...

WIDESIGHT價: $98

Eternal Sunshine of The Spotless Mind 無痛失戀

2006-04-21T01:10:00.000+08:00

很喜歡Jim Carrey認認真真地做戲。

故事: Clementine（Kate Winslet）與Joel（Jim Carrey）感情瀕臨破裂邊緣，Clementine決定借助先進儀器，洗掉兩人相處的不愉快記憶。Joel得知此事後，亦不甘示弱，決定有樣學樣。但當記憶一點一滴被洗掉時，他才重新發現Clementine的優點，千方百計要保住殘留的記憶。

故事概念很好, 男女主角決定洗去記憶是一時衝動, 但相信很多人都有想洗掉關於前男/女友的記憶。但很喜歡電影最後帶出的信息, 就算記憶沒有了, 仍然會再愛上同一個人, 唯一可以做的是互相包容。Jim Carrey演一個比較內向的角色, 和以往那些浮誇的角色比較, 真的很大對比。但他仍然演得很好。另外Kate Winslet的演出也保持水準, 我從很久以前就很喜歡她, 覺得她很有自己的格調。

Special Features一律欠奉, 但事實證明, 一個好的故事也夠令人覺得滿足了

至少我覺得很足夠了。

HMV價: $79

LADDER 49 火海豪情

2006-04-21T00:14:00.000+08:00

這是一套歌頌消防員的電影。

至從backdraft (烈火雄心)之後, 荷里活甚少再拍關於火災的大型災難片, 尤其當經過911事件之後, 救災等題材彷彿成為禁忌, LADDER 49應該是911之後的第一套。

故事由JOAQUIN PHONENIX飾演的消防員JACK因救援工作被困火場開始, JOHN TRAVOLTA飾演的消防隊長KENNEDY要在有限時間內, 將JACK從結構已經嚴重損壞的大廈裡救出來, 中間穿插JACK由第一天加入消防隊開始的事情。

荷里活火災片的典範當然是BACK DRAFT, 火災中加插曲折劇情, 兩者融合得很好。LADDER 49用了另一種方式 - 平鋪直敘。由於電影主題開宗名義是向消防員致敬, 所以用這種方法也無可厚非。但壞處就是每一幕都是可以預知的。JACK由第一天成為消防員到結婚生子, 之後英勇徇職, 每件事都很公式化。

劇情方面沒有驚喜, 所以集中欣賞製作水準。DOLBY的效果非常好, 定位很清晰, 即使用HEADPHONE, 感覺也非常好。畫面方面, 幾場大火都很有逼力, 不過比起當年BACKDRAFT最後一場大火, 感覺還差得遠。

SPECIAL FEATURES尚算豐富, MAKING OF(有COMMENTARY), DELETED SCENES, MUSIC VIDEO等等也有齊。另外還有一段講述消防員的片段。值得一提是DELETED SCENES裡面有一段提及911, 但正片裡面剪了。

HMV價: $99

跳房子 - A Wishful Way

2006-04-20T21:08:00.000+08:00

如果唔係蝴蝶, 我都未必會搵返出o黎聽。

聽聞2001年大碟已經完成, 製作前後用左20日。唱片公司壓到2002年先出, 令跳房子大為不滿。

野史講完。

唱片風格有d頹廢, 不過幾好聽, 田原英文咬字未算好好, 唔知有心定無意, 有d位唱到一舊舊, 不過佢唱起上o黎有一種好難抗拒o既味道, 幾好。

雛菊

2006-04-20T17:26:00.000+08:00

雛菊是一部拍得很美, 但不是一部我喜歡的電影。

我是充滿期望入場的, 也許這就是希望越大, 失望越大。郭在容的劇本加上劉偉強導演, 本應是萬無一失的, 但就是擊不起火花。

攝影出身的劉偉強, 通常都會把鏡頭用得很好。雛菊也不例外, 那片田野加上那條獨木橋, 畫面淒美動人。全智賢明顯胖了, 但導演還是把她拍得很美。但這角色太慘情了, 電影中段便啞了, 最後更要死在男主角懷抱。

男主角鄭雨盛外形很好, 飾演殺手也真夠有型有款。片中這個殺手無時無刻地耍帥, 真的有點兒受不了。男主角身為一個殺手, 家裡竟然是不設房的, 這也是一個劇本上明顯的缺憾。李成宰飾演國際刑警, 冒充成為女主角一直等待的人, 戲份不夠殺手多, 但電影上半部都是他與全智賢的戲。戲中講述殺手因為不想連累自己所愛的人, 才一直只送花而不現身。後來刑警死了, 殺手卻開始接觸女主角, 弄得最後給殺手集團捉住了弱點, 會否笨了一點!?

最後女畫家得知真相, 殺手才是她一直等的人, 前一刻還是深愛著死去的那個, 下一刻竟可以立即把情感轉移至其他人身上, 這也是我不能接受的地方。

最後女畫家為殺手擋了一槍, 一命嗚呼。導演為此安排了一場殺手復仇的槍戰。在這刻觀眾才知道殺手的身手可以和超人相比較。不流一滴血已經差點把殺手集團連根拔起。有這樣的身手, 當初就應該把殺手集團先幹掉嘛, 不用害死自己心愛的人。這場槍戰是多餘的, 作用只有破壞電影的氣氛。

雖然說了很多雛菊的壞話, 但它還有可取之處的。例如攝影, 美術, 服裝等等一絲不苟。導演控制節奏都很適當, 不過如果片長能夠剪短一些就更好。

最後一個鏡頭回到最初女畫家避雨的場景, 原來女畫家, 殺手, 刑警三人一早已經遇上了, 好像有些宿命的意味, 亦是全片我最喜歡的一幕。

在漫長歲月中, 我們偶爾垂淚

2006-04-16T20:23:00.000+08:00

還是蝴蝶, 真的欲罷不能。前兩天又再看多一次蝴蝶。由於是聽導演講評的聲軌, 知道了很多第一次看時忽略了的細節。蝶的書桌上那民主女神像, 黑白片裡的阮玲玉, 咖啡店裡一直繪畫的男人, 真真家中的天窗, disco裡的音樂, 很多很多。每個細節都有它的故事, 耐何也真的太瑣碎了, 看戲的時候實在容易忽略。

再把刪剪片段再看一次, 這次聽原聲, 更覺其中幾段不應刪去。尤其是蝶從學校遠望心湄離去時, 看到真真的幻影一幕, 真的十分喜歡呀。之後去圖書館借了陳雪的"夢遊1994", 把原著故事'蝴蝶的記號"看了一遍。也不是不好看, 但電影的感染力還是比較大, 而且加入了很多動人情節。再者, 原著故事裡, 心湄和武皓的結局也真太悲慘了, 一個自殺一個瘋了, 還是電影裡貼近現實, 縱然都不是美滿結局。

這是導演麥婉欣第二部的長片, 第一部是"哥哥", 全程用DV拍的。"哥哥"在幾個影展中都拿了幾個重要的獎項。也相信是因為有了這些背景, 才獲藝術發展局的49萬資助(也真夠"多"...), 也就是有了這初步的資金, 才會有蝴蝶。蝴蝶是她第一次35mm的作品。可以說蝴蝶才是她正式的第一部商業片。攝影師也是用新人, 鏡頭有些搖晃, 但整體合格有餘。

我很喜歡片中真真在少女時在大學牆壁上寫上的一句 -- "Were not we having tears in our eyes through the passing time?", 很喜歡...

蝴蝶

2006-04-16T01:21:00.000+08:00

Were not we having tears through the passing time?

蝶
從來都喜歡何超儀, 她一直都很用心去演, 只可惜她的背景阻礙了她得到應得的讚賞。這次她把蝶演得頗不錯。蝶的人生早在真真離開後, 已經不再屬於她自己的了。她結婚了, 也生兒育女了。然而當她遇上小葉的那一刻, 她想起了真真, 也想起了自己也應該可以有選擇。josie把蝶的神情掌握得很好。有人批評她生硬, 對白也沒有起伏, 但我覺得蝶就是這樣的一個人。

小葉
田原 -- 跳房子的主音歌手 -- 也能把握到小葉那種率性。小葉是一個在蝶面前可以很孩子氣的女孩子, 但內裡卻有種無形的堅強。她不需要蝶為她操心, 她會照顧好自己, 然後靜靜地等待蝶的回應。有點狡猾, 但這樣子的性格卻令蝶更加不能自拔。

八十年代 - 真真與蝶
由蔣祖曼飾演的真真是戲中非常重要的角色。我本身很喜歡joman, 覺得她很有型格。真真那種大膽任性, 憤世嫉俗, 她也發揮得不錯。那個年代, 真真與蝶的分開是無可避免的, 但戲中兩人許多的細節卻真的令人感動。蝶因為家庭反對而離開了真真, 陳逸寧在決擇的那一場戲發揮到位。真真與蝶的分開是無耐的, 就如戲裡所說: 一切都已寫好了, 我們叫這些做預謀。

還有...很多
除了四位主要的女演員, 其實戲中飾演阿明的葛文輝也是搶戲非常。阿明是一個很好的人, 他明知蝶喜歡上小葉, 只採取容忍態度。只要蝶不離開這個家, 他容許她做喜歡的事, 就算蝶從來未愛過他。阿明是戲中最大受害者, 葛文輝演得很到位。另外還要提的是蝶的兩位學生 -- 心湄和武皓, 蝶看著她們就似看到自己與真真。她想保護她們, 但始終做不到。這一段其實頗好看的, 但片長關係, 心湄和武皓的故事刪了很多, 幸好DVD收錄了大量刪剪片段。

相隔九年的日出日落

2006-04-14T01:23:00.000+08:00

一九九四年的維也納, 日出之前。

這是一個簡單又短暫, 但又令人難以忘懷的愛情故事。jesse在火車上巧遇celine, 兩人一見如故, 更相約一起在不影響各自行程的前題下, 用僅有的十四小時一同暢遊維也納。在日出之前, 他們把每一刻都變成難忘的回憶。然而當各自仍有路要走, 臨分別之際只好相約六個月後再見...

簡單的故事, 整部電影都是由jesse與celine的對話構成, 卻不會令人覺得有喋喋不休的感覺。看完的一晚, 感覺複雜, 遲遲未能入眠。

相隔九年的巴黎, 日落之前。

又是一個簡單又短暫, 但又令人難以忘懷的愛情故事。jesse在巴黎宣傳新書, 行程緊湊卻給他再遇上celine, 耐何jesse要在個多小時之後趕到機場。二人仍然把握時間相聚, 互相傾訴九年以來感情的不如意, jesse因為責任而結婚, celine卻不能真正愛上任何人。二人都把自己的感情遺留在九年前的那天。然而二人的未來, 卻要在日落之前決定。

比前作時間更短, 只在短短個多小時裡, jesse用盡藉口, 把握所有時間和celine一起。有人認為可能幾年之後會再有另一個延續, 但我相信成熟了的jesse和celine, 不可能再讓彼此在指縫裡漏走了。

The Constant Gardener - 無國界追兇

2006-04-12T23:29:00.000+08:00

繼City of God之後, 導演Fernando Meirelles再次將舞台放到非洲, 似乎對第三世界國家o既問題有d欲罷不能。rachel weisz(mummy o個個索女)憑呢套戲拎埋oscar, 的而且確係做得非常之好。男主角Ralph Fiennes香港人應該唔會陌生, 話哂都係"佛地魔"嘛。

故事: Justin Quayle在非洲肯亞擔任英國的外交官，而他的妻子Tessa Quayle則投身於當地的社會運動，尤其熱心於對抗大商家漠視社會責任的活動中。怎料她堅決大膽、挑戰權威的人權鬥士身份，卻惹來殺身之禍！有一天Tessa赤裸的屍體於肯亞北部一處荒蕪之地被發現了，而同行失蹤了的黑人醫生，則令此案調查的矛頭直指向感情瓜葛。當幕後黑手以為一向溫和懦弱又與世無爭的Justin會沉溺於亡妻之沉痛打擊，遠離事實真相之際；往日的回憶卻令Justin重新發現到他是多麼的深愛Tessa，甚至是從此時他才真的戀上她般，而他於Tessa身上更彷彿看到另一個自己。在重重的疑點與謠言和深深的後悔懊惱當中，Justin已立定決心去追尋他深愛的Tessa ----找出殺她的真兇和完成她決心要完成的工作。

套戲講o既野其實大家都知, 不過都係一路睇一路覺得難受。幾千萬人, 救得邊個? 但眼前有一個你可以幫o既, 係唔係應該仲堅持"幾千萬人, 救得邊個"呢? 片中又提及強國賣軍火俾非洲國家, 令呢d第三世界國家持續內戰, 而強國藥廠又捐贈藥物俾呢d國家, 一方面可以減稅, 另一方面當係贖罪, 但偏偏最荒謬o既係, 呢d藥物大多數都係過期o既 -- "等待報銷的藥, 給等待報銷的人"。

結局揭曉真相, 正義彷彿得到伸張。但每分每刻同樣o既故事其實仍然上演緊。又正如片末幾句諷刺的對白, "非洲沒有人被殺, 只有令人遺憾的死亡"。

講返碟片質素, 畫面大致清晰, 音效有dts es/dolby surround ex, 算係咁。special feature冇咩特別。最失望係只有中文字幕, 遇到對白想quote低, 就要聽清楚d。

[小插曲]
話說我去買呢套戲o既時候, 發生左d我覺得幾好笑o既野。我走入一間叫"rhythm"o既鋪頭想搵呢隻碟, 因為上星期係度買過野, 見佢幾好招乎同埋價錢都ok。我入到去就即刻有人貼身招乎, 我自把自為咁搵左一陣都搵唔到, 咁我唯有問個sales哥哥啦。對答如下:

我:我 s: sales

我: 唔好意思, 我想問有冇the constant gardener o既dvd呀?
s: (一臉困惑) 請問係知唔知中文戲名呢?
我: er...好似叫咩咩追兇咁ga (我真係唔記得個名)
s: (有d唔耐煩) 咁呀, 有咩人主演ga?
我: ra... (想講ralph, 但係驚佢唔識), rachel weisz (心諗呢個一定識啦)
s: ......(呆左兩秒)
s: 冇喎, 幫你唔到 (非常冷漠)

果一刻, 佢可能以為我玩野, 又英文片名又英文演員名, 好似我有心為難佢咁。不過我都係覺得rachel weisz你都唔識, 你學咩人賣dvd呀? 況且我真係唔知中文譯名嘛(原來叫"麗素慧絲", 真係難讀)。之後去左widesight, 人地counter個姐姐, 一聽就話有喇, 結果都係幫襯佢。

widesight價: $89

焉知非福

2006-04-11T00:57:00.000+08:00

非常慶幸尋日係銅鑼灣搵唔到, 因為如果呢兩套俾人搶左, 我會發癲。雖然係呢兩個星期買o既八套戲之中, 唯一可以安全抵步o既兩套, 不過實在太足夠喇。

widesight價: 各$79

又係我衰

2006-04-10T01:18:00.000+08:00

500蚊可以做好多野

可以捐俾宣明會可以同朋友食餐好o既可以買對鞋可以儲低唔用可以燒左佢。

但就一定唔應該拎去買DVD

因為買DVD o既話, 會未開封就俾人搶走。或者係最低限度, 唔應該係星期六/日去買。

所以呢個一定係我o既問題, 唔關人事。我唔買, 佢又點可以搶呢? 擺明係我引人犯罪啦

千錯萬錯, 都係我錯。

罪過呀...

小丑

2006-04-09T00:13:00.000+08:00

由猜測變成事實

再被宣之於口

先走進耳窩

再直插心房

卻一直被提醒不可以傷心

因為根本沒有資格

opps...漏左

2006-04-05T20:19:00.000+08:00

1. 廖雋嘉 - 鋼琴女生

應該係三個月前買落, 不過過左歌落IPOD之後就擺埋左, 執野先執返出o黎, 不過唔代表唔好聽喎。作為一隊失敗女子組合o既成員, 本來都對佢冇咩期望, 不過係電台聽左"hey john"之後就開始有d留意佢(不過首歌最後果段rap好難聽)。基本上隻碟質素幾好, 比起佢o個位突眼兜風耳o既隊友, 佢實在好得多。

三個月前信和價: $69

2. 南拳媽媽 - 2號�

上年出o既碟, 上個月先買返。其實有次上alfamusic個網, 試聽左幾首覺得幾好聽, 於是就想買。但係事隔大半年想再買返, 都係一件幾難o既事。hmv搵到有, 不過要$120。最後係灣仔行街時, 係188搵到有。總括都係好聽, 內容變化多, 點解香港總係出唔到d似樣o既組合o既呢?

一個月前灣仔188價: $82

When Harry Met Sally - 90' 男歡女愛

2006-04-03T20:44:00.000+08:00

對我o黎講, 呢套係有史以o黎最好睇o既愛情喜劇, 幾時再睇返都係一樣咁好睇。

難得HMV特價, 49蚊。畫面大致清晰, 雖然睇得出已經remaster過, 但係間唔中都仲有D菲林花痕, 不過舊片難免, 況且呢d類型o既戲畫面要求唔駛咁高。音效配左dolby, 不過得2.0, 愛情片冇咩所謂啦。

故事:享利和莎莉相識於大學畢業禮當日，二人更一同駕車由芝加哥前往紐約。他們對男女關係持不同態度，更為發生性關係會否破壞一段友誼而各持已見，但過程倒相處愉快。十一年後，享利和莎莉都有自己的生活和戀愛經歷，這對好友再次碰上，惜仍未能找出答案，他們會否承認對對方產生微妙的感覺，還是繼續逃避呢？

special features裡面最緊要o既係deleted scene, 裡面有幾段都真係幾好睇, 尤其係billy crystal問meg ryan有過幾多個男人果段, 唔明點解要cut左佢, 因為好正。另外sally bad date都幾好笑。不過deleted scene冇字幕兼冇remaster過, 質素同錄影帶差唔多, 不過都係果句, 十幾年前o既戲, 原諒佢啦。

女人萬歲

2006-04-02T19:46:00.000+08:00

女人真係好得意, 可以預先假設面前o既男人, 如男友,老公,普通朋友...類型不拘, 係會忍受佢o既野蠻, 之後再肆無忌憚地做d好橫蠻無理o既事。而佢面前呢個可憐o既男人就一定唔可以發嬲, 如果唔係就會係冇風度, 唔夠體貼, 粗魯...總之就罪大惡極。

而呢d咁荒謬o既事, 又絕少發生係女人同女人之間。

所以我成日都話, 香港男人係極品。

死亡寫真

2006-04-02T00:36:00.000+08:00

好耐之前已經想買, 不過初出要79蚊, 而且冇卡士冇特技, 唔捨得買。點知就係兩個月前o既某日, 行過d平霸vcd鋪, 見到賣緊29蚊, 仲要係un-cut版喎, 唔駛諗啦。

自從"見鬼"之後, 彭氏兄弟就紅左。人紅左, 錢就自然搵上門。錢多左, 兩兄弟又可以分開搵食。彭發就搵左鄭伊健同阿sa拍左"阿孖有難", 彭順就搵左2R去拍呢套"死亡寫真"。"阿孖有難"就麻麻地, 只算係偶有佳句。以戲論戲, "死亡寫真"就真係幾唔錯。

RACE做一個幾變態o既角色, 以一個新人o黎講認真唔錯, 有前途。ROSANNE其實都OK, 不過冇乜戲做。成套戲條軌都算幾順, 尾段又夠緊張, 係少數令我睇到會心寒o既戲。

special feature主要都係deleted scene同埋making of, deleted scene可以聽下導演講解, 不過小心訓著, 因為佢把聲悶到抽哂筋。

四眼雞丁 - Chicken Little

2006-03-29T20:26:00.000+08:00

因為o黎緊o既"CARS"會係迪士尼同PIXAR最後一次o既合作, 所以迪士尼要積極開拓自家製3D動畫, 頭炮就係呢套"四眼雞丁"(Chicken Little)。其實"四"並唔係迪士尼首次自製3D動畫, 2000年曾經出過一套"恐龍世紀", 全球票房成績都唔算差, 不過同PIXAR製作比較, 就仲差幾條街, 而且實情套野就真係悶到嘔泡。可能迪士尼都知衰, 所以之後就冇再自己玩野。

直至同PIXAR傾唔掂數之後, 佢都醒覺到自己都係時間再起步, 於是就搵左"史力加"製作人自組o既公司 - Vanguard Films Production, 整左套"v仔特攻隊"(Valiant), 因為係試金石, 成本只係4000萬美元, 不過衰就衰在全美票房連一半都收唔返。大公司當然有兩手準備啦, 另一方面迪士尼自己都有做野, 就係呢套Chicken little。鑑於"v" o既仆直, chicken little對迪士尼o黎講, 就變得非常重要。

係鋪天蓋地o既宣傳下, 醜婦終須見家翁。可能係皇天有眼, 唔想一個動畫王國咁快走向末路。結果就係俾佢搏到囉, 但係唔係真係好睇呢!?

係戲院上o既時候我冇入場睇, 都係果句, 而家d戲院睇呢d動畫係o徙氣, 除非係imax。所以一心等佢出dvd先算。

結果再次證明, 世上唔會有邊個冇左邊個會唔得, 但係disney冇左pixar就好唔得。成套野真係低能得可憐, 除左幾個scene可以笑得出, 其他都係悶到抽筋。故事老土唔緊要, 如果講故事手法OK, 我相信唔會有好多人介意故事老唔老土。可惜成套戲無論故事, 講故事技巧都係零。

兩個字加一個標點: 失望。

三區dvd有粵語配音, 以谷德昭配得最好, 少爺占同阿sa...都係咁樣, 冇咩特別。special features最有睇頭係deleted scene, 仲有個making of都算唔錯。

盛惠$105, 有多餘錢都唔好俾佢呃, 買俾細路仔睇就例外。影片之外仲有幾個TRAILER, 其中一個應該係下一炮3D動畫, 不過睇完個TRAILER已經開始擔心...故事有D似"荒失失奇兵", 偏偏又冇人地咁有睇頭。

唉, 迪士尼, 唉 ~

理想主意者

2006-03-25T18:50:00.000+08:00

吃飯時剩太多飯菜, 便會覺得內疚, 因為想起了全球每日還有八億多的人因為天災人禍而挨餓。

看到別人以野戰遊戲為消閒活動, 便會有厭惡感, 因為知道長期戰亂的地區有很多孩子, 被沉重的槍支抹殺了應有的童真。

看到年輕人因追求玩樂而荒廢學業, 便會感到痛心, 因為世上有四分之一的小孩子連讀書的機會也沒有。

有以上思想的人, 通常被稱為理想主意者。

理想主意, 如果以現在的社會標準量度, 代表了不設實際。事實上誰都知道戰亂不會平息, 窮人只會更窮, 因為富者只會越富, 世界的不公平只會越來越嚴重。既然如此, 為何還要為這些無可奈何的事費心呢? 人生匆匆數十載, 反正末日還未準備來臨, 不如睜一隻眼, 閉一隻眼, 開開心心的生活吧。不追求世界和平, 還有很多東西可以作為人生目標啊, 例如一部名貴跑車, 又或是一個限量版的PRADA。

"哪裡有戰亂, 哪裡有飢荒通通不要告訴我, 幫不了忙還是不要知道比較好", 只要有這種心態, 生命彷彿會比較幸福。

世上還是會有理想主意者, 儘管他們都對世界無可奈何。部分人連自己的生活也沒有照顧好, 卻想著要拯救世界, 真犯賤。

然而, 我還真慶幸世上還會有這些蠢才, 令這個越來越荒謬的世界還可以讓人有勇氣活下去。

記憶

2006-03-20T23:50:00.000+08:00

每個人都總有一些人或事, 想忘記, 但又忘不了。

想忘記, 是因為不想接受已發生的事實; 忘不了, 因為根本不想忘記。於是就選擇把它埋在心的深處, 再用其他記憶厚厚的壓著, 之後裝著若無其事的繼續生活。

很消極, 但又可以怎麼?

然而, 記憶是一種很奇妙的東西。它會藏身於抽屜的最裡面, 待你在下次大掃除時偶然發現, 要你還它一聲感嘆; 它會躲進你的床畔, 當你午夜夢迥時挑撥你的淚腺, 勾引你的眼淚; 它更會無所不在, 當你望向商店那些漂亮櫥窗的時候, 倒影卻反照出心底最懷念的人, 讓你一時間不知所措。

在那一瞬之後, 你可以做的最多只是默不作聲, 等待心情再平伏。一天過後, 你又會再次把它壓到最深處, 因為你知道, 生活還是要過的。

酒後檢討

2006-03-15T23:59:00.000+08:00

1. 飲左半打啤酒再去唱"四面楚歌"係一件令人遺憾o既事。

2. 飲左超過半打啤酒會差d講左d唔想講o既野, 好在兜得住。

3. 頭腦仲可以好清醒, 不過身體唔係。

4. 發覺應該可以再飲多至少3罐, 下次要試下。

5. 想食薄荷糖但係會拎唔到上手。

6. 唔好沖熱水涼, 沖左會好wing。

7. 打唔到字, 做唔到program。

8. 第二日返唔到工, 繼續做唔到program。

9. 唔知點解, 個身會好痛。

10. 橫掂都係wing, 早知飲芝華士。

Gathering @ 3/13/2006

2006-03-14T17:00:00.000+08:00

因為KIM姐終於肯arrange, 所以又有gathering。

出席人仕有我, 豆, 歌神同kim姐, 地點係創興neway。

原先都係諗住食下野, 唱下歌, 傾下計咁。點知唔知幾時阿豆拎左幾個骰盎入o黎, 又順手整多半打啤酒, 心裡面都暗暗地講左聲粗口。初頭都係飲一兩啖就算, 因為返去仲要趕program。之後玩左幾鋪大話骰, 輸多贏少, 結果又飲多左d。再之後kim姐竟然好豪咁提議玩"789", 又唔知點解佢輸我要幫佢飲喎...而我本身玩呢個game係黑到震o既, 結果前後一打啤酒, 我起碼o拍左7罐, 失戀都冇飲咁多呀...

我其實都犀利, 飲左咁多我都可以保持思路清晰, 雖然個身體已經唔係好聽駛, 不過都總算行動如常, 仲行到直線。一直玩到11點幾先走, 本來想行過火車站搭車, 順便可以散下酒, 點知豆話搭的士, 我當然樂得有順風車坐啦。

以為返到屋企冇事, 點知先係最辛苦。腳步開始不穩, 坐都有d坐唔穩。開部電腦, keyboard都差d打唔到, 好耐好耐都未試過要望實個keyboard先可以打到字, 又想嘔喎, 訓又訓唔到...最衰係個腦仲係好清醒。

不過真係玩得好開心呀!! 下次要飲chivas!!!

光良 - 約定

2006-03-12T01:08:00.000+08:00

呢個世界有d歌手, 每次佢出碟, 聽眾都會期待有新元素; 另外又有d歌手, 每次出碟都唔會有特別驚喜, 但又永遠都可以討得樂迷歡心。

光良無容置疑屬後者。由"第一次"到而家o既"約定", 光良o既風格可謂完全一樣, 不過樂迷仍然受落, 而我亦係其中一份子。

究竟"童話"係唔係真係咁好聽? 又究竟"約定"可唔可以延續呢個強勢? 呢d問題其實唔緊要, 只要佢而家係紅就得, 況且同類型o既自作自彈自唱o既歌手唔多, 就算有又未必有佢咁好聽, 所以我相信光良仍然會紅好一陣子。

ATH-C703WH

2006-03-10T00:42:00.000+08:00

我一向都覺得聽得mp3, 就唔好有咁高要求, 所以我一直都係用返原裝earbud。一首encode得最好o既mp3都只係320kbps, 同CD, 甚至MD都仲有段距離。但係以前D人唔會買D二三千蚊o既headphone o黎聽cd/md, 但係而家竟然肯用咁o既價錢去買d歐洲名牌headphone o黎聽mp3, 感覺就好似某d國家為左殺一個人而用上兩枝飛彈一樣。

因為最近隻earbud俾我唔小心整死左, 搞到我要買過隻earphone。本來想買返earbud算數, 但原來最平都要連remote一齊買, 要300個大洋...結果就買左"audio technica ath-c703"。買佢係因為抱住"雖然平, 但話哂都係名牌, 唔會差得去邊掛"o既心態, 而且個款幾靚~

ath-c703
--------------------------------------------------------

Type Dynamic
Driver Diameter 15.4 mm
Magnet Neodymium
Frequency Response 14 - 24,000Hz
Maximum Input Level 50 mW
Output Sound Level 102 dB/mW
Impedance 16 ohms
Weight 3 g
Cable 0.5 m
Connector 3.5 mm mini stereo, gold-plated
Accessories Furnished Extension cord 1.0 m, ear pad (2 pieces)

我

2006-03-04T20:16:00.000+08:00

每次同ive同學仔gathering都必定會有幾個話題, 就係"你做緊咩工?", "你幾時轉工?", "你份工做咩ga?"。

因為大家都係IT呢個field搵食, 所以講下呢d野都無可厚非, 但我都係好驚呢d話題, 好似朋友之間有種無形o既競爭, 然後總會有一方被比下去。席間有朋友(唔止一個)已經有頗清晰o既事業發展藍圖, 即係已經plan定下一份工係想做d咩, 有d咩cert要考, 諸如此類。然後有人問我幾時轉工, 我都呆一呆, 是但答左"過埋year 1先啦";但我其實冇好認真諗過呢個問題。

忽然發覺原來人地係發展事業, 而我只係努力(?)工作。

我而家呢份工, 人工過得去, 起碼我仍可以買好多碟同書;工作時間又自由, 只要唔好做錯野, 唔會有人干涉我返工放工時間。同事關係良好, 上司又縱容我; 話就話5日半, 不過實際就係5日。之不過, 係冇咩前途囉。

聽見朋友們之間討論工作上o既野, 每個人份工都好似好多野做, 或者用佢地o既用詞係多野學。有時聽到呢d對話, 我可以完全入唔到腦, 好似唔同世界o既人坐埋一齊飲茶咁。事實上近兩三年, 我真係對電腦呢樣野好厭, 以前會keep住update自己, 令自己就算唔識做都識講, 但係而家真係講都未必搭到咀。

讀degree都只係出於情意結, 極其量都只係想搵工時人工可以高d。上進心我真係冇乜, 要我plan幾年o既野真係無謂, 我最多只可以plan下聽日餐lunch食咩。

努力工作為左有錢進修, 進修又係為搵份好工, 綿綿無絕期。我覺得除左事業, 花花世界仲有好多野值得關心, 例如有咩新野玩。

可能以上係我o既歪理, 但係反正係我自己, 點歪都唔緊要啦。

"我是甚麼? 是萬世沙粒當中一棵。石頭大這麼多, 我也會喜歡這個我。"

命懸一線

2006-03-04T01:25:00.000+08:00

或者咁講係誇d, 亦已經唔係第一次發生, 但o係o個一刻, 我真係覺得會死。

話說我o既嗜好係買cd, 買dvd同買書, 呢三樣野都需要一定空間儲存, 而我屋企就偏偏得豆腐咁大, 結果驚險鏡頭就日復日年復年咁不斷上演。

就係今日, 我終於頂唔順自己電腦臺面亂到連想寫野都搵唔到位, 而mon o既下半部都已經開始被雜物所遮掩。咆哮一聲之後, 我決定要進行清理。首先將d野分類, 其實都係得三樣野: dvd, cd, 書。執執下真係覺得自己有d痴線, 有好多dvd原來買左返o黎年幾都未睇;又因為平而買左一堆vcd, 又係未睇;有d cd買返o黎都好少聽, 轉完mp3就擺左係度, 隨碟送d vcd/dvd更掂都未掂過。書就好d, 起碼都睇得哂。就係咁, 總數幾十件野俾我分好哂類, 準備搵位擺之際我先醒覺...邊度有位呀!? 抬頭望下個書櫃, 見到好似仲有d位, 用盡哂d位應該可以擺得哂呢堆野o既...

點知一出手就賴野。一打開個櫃門, d野好似想親吻我一樣, 爭先恐後咁向我飛撲埋o黎。當中包括一堆dvd, vcd, cd同書(冇錯, 同之前描述過o個d野係差唔多), 再加上幾隻action figure, 一部dreamcast, 幾隻mouse同糖鑵, 就係咁湧落o黎...就係千鈞一髮之際, 我右手及時閂到其中一邊櫃門, 不過左手都係阻止唔到一set dvd怒爆我個頭。我忍住痛睇下咩碟咁堅, 原來係"她從海上來"dvd boxset...唔怪得佢, 我擺左佢係度成年半都冇理過佢, 係惡d ga喇...不過我仲好珍惜佢, 我仍然深信我買佢o個時, 佢已經係全香港last一盒。

最後, 我都忍痛將所有野都塞哂落個櫃裡面, 而我亦預見得到"命懸一線"二三四部曲已經排緊隊, o黎某年某月某日o黎個盛大公演...

Gathering @ 2/26/2006

2006-02-27T22:25:00.000+08:00

gathering搞得成, 不過本來係buffet, 而家變左金滿庭。柯氏伉儷, 秉, 民, 輝, 積高連埋遲到o既我, 7個人食左7百幾蚊, 都ok啦。不過如果係buffet就更好囉。

食完之後去左一間樓上cafe傾計, 本來諗住去charlie brown cafe, 不過多人到嘔。結果去左一間叫"皆屋"o既cafe, 坐就略嫌逼左dd, 不過傾計都ok o既。一坐低第一件事就搵份cake menu, 款就少左d, 不過都有new york cheese cake, 好過冇。點知果舊所謂new york cheese cake比我食開果d細起碼一半, 而且係唔好食。一d cheese味都冇, 奶味就濃到痴線, 一句說話: 難食。民果件chocolate moouse都唔係好食, 不過都好食過我果件, 好唔開心呀! 娜姐果杯布丁更只係啃左一啖, 雷文果件栗子moouse都係食左一半...成間cafe d甜品都係唔掂。另外我杯芒果牛奶就似芒果沙冰, 一d奶味都冇, 又唔滑...唔駛旨意我再去。

言論間大家已經計劃緊下次gathering, 有人提議打wargame。

唔知係我痴線定咩, 我對wargame係十分之反感。一聽到第一個反應就係:唔去。我始終覺得war同game唔會係同一樣野。所以話人越有錢就越痴線, war竟然可以變成game! 可能係我out又或者係我懶清高, 但係拎住槍枝互轟一定唔係好玩o既事, 即使係"game"。

正月未過, 繼續賀歲

2006-02-25T01:45:00.000+08:00

1. 梁祝下世傳奇

又係果句, 我對何韻詩係冇免疫力o既, 況且真係good show喎!!

2. 如果?愛

絕對係BEST PICTURE OF 2005, DTS仲有24BIT/96KHZ, 掂到唔知點形容。

3. 霍元甲 - 周杰倫

CD兩首歌唔係重點, DVD有齊"11月的蕭邦"咁多歌o既MV先吸引。

4. LIFE CONTINUES... - 陳奕迅

在新藝寶再上路o既第三張唱片, 質素仍然令人覺得可喜。留意唱片監製, snowman黃金組合啊!

5. SOULBOY - 方大同

作為第一張唱片, 質素之高應該令好多前輩汗顏。

我不會唱K

2006-02-22T23:36:00.000+08:00

今日本來約左serena, mandy, jane, athena同kevin行山, 難得kevin請假都去, 最衰我請唔到假, 如果唔係就一齊去...唯有夜晚meet佢地唱k。

其實間唔中都會去唱K, 不過總係次次都有D陌生, 睇住果幾十首"新"歌, 9成都係唔識o既。唔知幾時開始, 唱k唔再唱beyond o既"我是憤怒", 唔會再因為太大聲而俾人cut聲, 唔會再熄哂d燈, 唔會再有一陣煙味, 唔會再有粗口橫飛, 唔會再有國榮之夜......同以前好似兩個世界咁。

jane同kevin唱得好投入, 不過佢地唱果d, 我全部都唔識...我點左黃鶯鶯o既花言巧語, 俾人話我老餅...想唱果d又唱唔到...又冇唱到leslie喎...serena又首首都唔識唱, 今晚都唔係咁好玩o既...之後又冇節目...

為左安撫我心靈, 所以之後落左旺角買dvd~

生日快樂

2006-02-22T00:34:00.000+08:00

生日快樂

真心希望你能夠活得快樂

即使我不能看到

樣衰

2006-02-22T00:04:00.000+08:00

樣衰, 到左今時今日已經唔止形容一個人o既外貌。外表美麗都唔代表你唔會有樣衰o既時候。而以下o野事絕對係我覺得做左就會好樣衰o既野。

1) 吃喝玩樂時為左一個幾毫算到盡, 呢d唔係美德, 係寒酸。
2) 明明唔識某範疇o既野, 又要扮識, 但係一出聲就知你係吹水。
3) 追看八卦雜誌。
4) 跟"潮流"著衫, 搞到一出街就撞衫撞到七彩仲以為自己好型。
5) 用冒牌野。
6) 以"沒有"為榮。"我冇email account喎", 講o既時候仲有半分自豪。
7) 扮專家。可能你係好識野, 不過太想show off, 係咁拋出一d人地唔明o既terms。
8) 自以為好緊要, 有d人真係以為自己係不可或缺。
9) 扮熟。同你傾過幾次計就以為同你好熟, 可以稱兄道弟。
10) 污穢, 例如周街撩鼻。
11) 以為食煙好型, 呢d人真係低能得緊要。
12) 做觀音兵。
13) 講左唔好笑o既笑話, 又唔識同自己打完場。
14) 成日"我個friend話..."。
15) 滿足於自己o既無知。

九龍木球會 @ 2/17

2006-02-19T23:27:00.000+08:00

因為serena就快走, 所以又有一餐farewell dinner食, 地點係九龍木球會。

成世人第一次入呢d所謂 club house, 原來咁多規則要守, 例如電話唔可以響, 如果唔係罰500蚊; 唔可以講電話, 唔可以喧嘩。簡直係痴線, 我地一班人, 中間有d又喪喪地, 又點會唔喧嘩丫, 結果搞到潘先生有d尷尬, 真係唔好意思...而我又好唔聽話咁講左電話...

成晚都係吹下水, 席間仲要俾athena同mandy兩個玩, jane又唔識做...呢d時候應該唔出聲嘛, 你反應越大, 佢地咪玩得越開心囉...仲有, 點解會無情情玩我o既呢!?

仲有, 成晚都係食咖哩, 仲要係好地度o既咖哩, 食到我想死, 又牙肉痛喎...athena就食到上哂癮咁, 痴線ga!! 甜品有雪糕窩夫同埋apple crumble, 個apple crumble超好食呀...

150cm life [2]

2006-02-12T18:37:00.000+08:00

"依然只有150cm，進入游泳池只敢停在130公分處

依然只有150cm，開車椅背一定要保持90度直角

依然只有150cm，看牙總被醫師說：再坐上來一點、再坐上來一點

仍然只有150cm……"

如果要歸類, 呢本應該係漫畫。

其實我係由"一個人住第5年"開始睇, 之後先睇返"150cm life"。後來再出左本"一個人上東京", 之後就停左好耐, 直至現在又整多本"150cm life 2"。

除了幾米作品, 本來我都唔會買呢d多圖少字o既書睇, 不過某日睇到博客來個email裡面"一個人住第5年"o既廣告, 好似幾得意, 咪買o黎睇下囉。點知真係幾得意喎...就係咁就沉迷左落去喇。

"150cm life 1&2" 都係講作者高木直子自己因為生得矮而發生o既一d有趣(?)o既事情。呢兩本最好睇, 因為我本身都唔係高, 雖則未至於150cm咁大鑊, 不過都感受到"矮"帶o黎o既苦處...

"一個人住第5年"就係講佢由鄉下老家搬入城市一個人住, 5年間o既生活。

"一個人上東京"比較悶d, 講返佢係東京o既生活, 有d野同上面兩本有d重覆。

大眾書局: $73
田園書屋: $51

狗年第一擊 - 怪誕屍新娘 Corpse Bride

2006-02-05T19:57:00.000+08:00

經過左一月o既禁慾期(光碟購買慾)之後, o黎到二月, 又係狗年o既開始, 所以一定要買碟賀下佢。
本來一心想去買"林狗", 但係太貴喇, $199我可以買兩套戲。"如果．愛"又出左, 不過實在決定唔到買豪華版定普通版, 結果就買左"怪誕屍新娘"(CORPSE BRIDE)。

其實CORPSE BRIDE都有分兩個VERSION, 不過DELUXE VERSION個CONTENT吸引唔到我, 所以都係買普通版, HMV價: $115。

全片只有77分鐘, 不過DVD畫面質素頗高。主題顏色都係灰灰暗暗, 黑位尤其多, 試機不妨考慮下。我成日都覺得呢類型o既動畫, 睇DVD會好過入場睇, 因為數碼化後o既畫面先真正表演到原本o既質素, 當然如果有IMAX, 就梗係入場睇啦。
當年NIGHTMARE BEFORE CHRISTMAS只用泥膠公仔拍攝, 影片完成度及流暢度之高, 技驚四座。到左今時今日, TIM BURTON再o黎玩多次, 加上電腦特技幫助, 創意可以不受局限, 畫面構造上都算得上無懈可擊。
故事幾得意, 緊張新郎VICTOR o係森林練習結婚誓辭, 誤將戒子帶到屍新娘EMILY手上, 更被拖到陰間去履行結婚承諾...最後當然大團圓結局, 成個構想幾好, 但就不及NIGHTMARE BEFORE CHRISTMAS咁荒誕好玩。影片裡面色彩安排得幾有心思, 陽間成日都係灰灰暗暗, 相反陰間就色彩豐富,

由於影片長度短, special features都幾多, 都幾抵睇。

釣魚翁郊遊徑@大年初一

2006-01-31T00:23:00.000+08:00

大年初一去行山, 唔係犯賤會係咩呀...

上星期某次食飯途中serena同athena忽然話初一搞行山, 以我o既為人, 係唔係都話去啦。之後一路打聽初一有冇家庭聚會, 點知係冇o既, 所以最後都冇藉口唔去。就係咁, 十幾年o既年卅晚都未試過咁早訓, 順帶十幾年o既年初一都冇咁早起身。

準時11:00集合, 數下人頭...TOMMY無故缺席, ATHENA病左...不過就多左SERENA仔仔同SERENA囡囡, WILLIAM同埋CIMY(唔識o既, 因為係舊人)。就係咁, 一行九個人就向呢個釣魚翁郊遊徑出發喇。

當日天色真係好正, 沿途風景都好正。由高處望出去, 真係海天一色, 好靚。

一路行呀行, 行左個幾鐘, 有人問點解仲未到山頂o既, 點知SERENA話已經過左上山頂條路, 如果要上去就要行返轉頭...因為佢掛住傾計, 唔記得帶大家轉去上山果條路...OTZ...事後都覺得好在上唔到山頂, 如果唔係我一定會死係山上...

行左一半有多, SERENA話已經尾聲, 大家正講緊點解今次咁易行之際, 真正o既地獄先出現。原來尾段要誇過一個山頭先可以落返大廟, 而路就只有一條係咁上o既石級。果條石級真係痴線, 一路行一路行, 我由行最頭變成行最尾, 由游刃有餘到筋疲力竭, 條石級都係行唔盡, 綿綿無盡期。上到頂已經有d意識模糊...真係樣衰。

之後真係落山喇, 又係一條石級到尾...終於落到山, 感覺好似執返條命咁。

瞎拼=Shopping@一年一度

2006-01-24T23:57:00.000+08:00

香港人好得意, 有好多中國傳統唔會咁重視, 但新年買新衫新褲新鞋新mp3新相機新電話就一定唔可以少。我梗係都唔例外啦, 都係果句, 一年一次嘛!

其之一) 外套篇 1

本來都唔想入o個間"B"公司買野, 不過行左"L"專門店同"C"專門店都冇收穫(其實睇中左一件, 不過要$1999...), 而且發覺香港D "L"而家冇左"D"賣, 令人失望。
一入到"B"公司, 即刻有個SALES姐姐...唔係...係妹妹先真人釘人咁跟住你, 仲幾靚TIM...
一路睇左幾件都幾喜歡, 每次我拎起一件o黎睇, o個位妹妹仔就會講"呢件特價抵買呀, 個款又靚", 好似鸚鵡咁, 好得意。
結果買左件同我一向style唔同o既外套, 著上身覺得幾得意, 不過可能以後會好少著...

其之二) 牛仔褲

我係上年已經話左今年如果唔可以著細一個碼, 就唔會買"L"牌子o既牛仔褲。結果當然係冇瘦過啦, 而且呢兩日都係咁行佢d專門店tim。入到去就自動波咁拎起條褲睇下...又加左價...其他款又唔加, 係要加呢款, 擺明恰我淨係買呢款啦!!!!
好!!! 我屈服!!!

其之三) 外套篇 2

買完褲之後再周圍行下, 係"RSH"見到某"U"運動牌子一件薄身外套, 覺得好靚。睇下價錢, 百幾蚊咋, 勁抵啦!! 但SALES姐姐望左我一下, 講左一句:"「得返細碼至喎。」
不過唔緊要, 第二日俾我係太古城搵到, 我仲好理直氣壯咁講:「加大碼丫唔該。」

其之四) 本來係波鞋篇

最後一日, 想平平地買對converse襯下衫啦,點知d鞋鋪多人到嘔電, d sales又做到嘔電。我都唔好意思再加重佢地負擔, 轉頭就走。諗住都係陪人行ga喇, 點知又係某"M"裡面見到件牛仔恤, 試上身又good fit, 仲半價tim...買埋佢。

當手電跌落屎坑

2006-01-22T00:30:00.000+08:00

就係今朝去完廁所, 沖完水之際(事後我好感謝我自己有沖廁o既良好習慣), 唔知左手定右手, 諗住拎個電話走人啦, 點知隻手一震, 個電話一跌, 就跌正馬桶個窿...撲通一聲, 沉到底。

我即時講左一句粗口, 0.01秒之後就即刻伸手入去執。一拎上手睇下, 仲開住, 個wallpaper仲識郁已經覺得好神奇, 之後即刻熄機, 抹乾d水再睇真d, 冇入水喎...不過keypad同gap位都係積左d水。二話不說拎風筒吹啦, 吹完再開機check, 開到喎!!!! 識響識震識影相, 打得出打得入藍芽紅外線全部冇事!!! 開心到我丫!!! Samsung我愛你呀!!!!!

孫燕姿香港演唱會 Part II

2006-01-21T20:02:00.000+08:00

上次好辛苦先睇到200蚊飛, 所以今次一早訂定400蚊飛。
因為已經事先聲明係加場, 唔係另一個新concert, 所以已經有哂心理準備睇返上次d野。結果雖然係差唔多, 不過都算有d變化o既, 有d新編排, 新歌同埋今次有玩人浪咁囉。不過成個rundown同上次差唔多。
第一位嘉賓係薜凱琪, 佢一出場勁多人去廁所...唱左"奇諾里維斯回信", 講真唱live都算有進步啦, 不過都係唔好聽囉。

第二位嘉賓係楊千嬅, 著左件blink blink 衫, 勁閃。同Yanzi合唱左"遇見", 之後拎部相機出o黎要求同yanzi合照, 勁好笑。跟手唱埋隻"烈女"(又甩咀喇)就收皮。

之後好快, 10:15就講致謝辭喇, 同上次一樣, "the moment"之後就encore, encore部分有新野睇, 同上次唔同, 不過最後都係"天黑黑"埋尾。

出到外面都係10:45, 仲早過上次...不過開場前買左條靚靚電話繩, 都好滿足lu。

相簿 http://spaces.msn.com/members/sillypilot/

獎品=雞肋=點算

2006-01-20T00:33:00.000+08:00

講真一句, 我從來都唔期望o係任何抽獎活動中得到任何大獎, 除非份獎品好大, 例如係幾萬銀o既現金獎。因為我絕對相信幸運係有quota o既, 用完就冇。所以我絕對拒絕自己o既幸運浪費在無關痛癢o既獎品身上, 尤其係一部價值$699 o既mp3 player。

都怪自己口臭, 人地中獎時候開玩笑話佢d幸運就係咁樣浪費哂, 點知自己跟手就中左個大獎。當初都有一陣興奮, 之後就聽到好多人都想要, 但為免得失任何人, 打死我都拒絕當場繳械。

其實我都想將部機俾左人, 因為當你用開IPOD+ITUNE呢個無敵組合, 好難再去用松日呢部唔支援SUB-FOLDER, 唔支援PLAYLIST, 單行DISPLAY o既機仔, 比我幾年前o個部128MB o既function仲差, 雖然佢個款都ok靚。

但係俾邊個呢, 又係一個問題...

點解買獎品o個個人唔買IPOD Shuffle呢, 差幾十蚊之嘛, 起碼我光明正大拎o黎收藏, 話哂都係IPOD FAMILY 嘛

劉若英 - 我想跟你走

2006-01-19T00:28:00.000+08:00

我差點兒就在博客來那裡訂購了, 正如上次買"下樓談戀愛"一樣。慶幸等多了幾天, 在田園書屋找到了。

劉若英, 正如我之前所說, 是我一個很喜愛的歌手/演員, 從來都沒有甚麼驚天動地的新聞, 只是一直在演戲, 唱歌。演技在她第一部戲裡就被肯定了, 歌唱事業也一直保持成績 -- 在這個華語唱片仍然艱難的時候, 每次發片也保持一定銷量已經算是成就了。

這是她繼"一個人的ktv", "下樓談戀愛"之後的第三本文字作品(03年的演唱會記事不計在內)。近年台灣的藝人都很流行出書, 我看過一些, 很爛。最近蔡依琳也出版了一本英語教學的書, 想起也令人作嘔。但, 不要把劉若英的作品也混為一談, 因為她就是寫得好。

不信? 買一本看看吧。

草蜢我們的演唱會 LIVE DVD

2006-01-05T21:31:00.000+08:00

想了很久也找不到言語去形容, 然後忽視回想到歌詞 ---

[將千色燈再開動]

感謝周耀輝, 一句就貼切形容了的草蜢回歸。的而且確, 有了草蜢, 近幾年隨著幾顆巨星殞落而暗淡的樂壇, 似乎真的多了星光在閃動。

期望06更精彩

獅山遊@boxing day

2006-01-01T01:04:00.000+08:00

平時踢都唔願郁下o既我, 竟然會走去行山...只可以話係聖誕節o既神蹟。

SERENA, JANE, BECKY, HELEN, SUSAN, WILLIAM & 我, 一行七人就好似THE FELLOWSHIP OF THE RING咁踏上征途。首站係望夫石(沿途路牌話我知, 望夫石有兩個英文名: MONG FU SHEK / AMAH ROCK, 我好鍾意前者囉)。石梨貝水塘出發, 行左一個鐘左右就到。不過已經行到有D虛脫, 事關條路屈我一定要行石級, 仲要係好大級果隻, 我呢D死肥仔行親樓梯都死下死下, 而家仲要係加強版, 慌我唔死得咁。

到左舊石就係咁意影D相之後又要起程, 話明獅山遊, 都要上獅子石睇下o既...

好苦好苦咁去到回歸亭, 食D野之後就要上獅子石, 以為會好辛苦, 點知要落手落腳咁爬仲正過之前行石級, 話咁快就到左頂...冇咩挑戰性, 哼! 不過上到去, 都幾有成功感ga。又係例牌影下相, 坐下傾下計之後又話要落山喇。落山反而有d難度喎, 不過BECKY以近乎馬騮先有o既身手, 沿路一直快放, 視山壁斜坡如無物, 果然女中豪傑....

之後一行人再JOIN埋KEVIN, MANDY, 華姐同埋TRACY (呢個第一次見, SERENA話係元老級人物呀)去旺角韓燒(係, 又係韓燒), 食完野之後又冇節目, 各有各散...都好o既, 因為已經有d虛脫。

12月的收穫

2005-12-30T01:45:00.000+08:00

我十幾歲果時同人講我喜歡劉若英, 有人話我扮野, 話我怪, 甚至有人問"邊個o黎ga?"。過左咁多年, 我仍然係咁喜歡劉若英, 佢唱歌唔會係最好果個級數, 不過我愛奶茶, 不能自拔地愛。
講返隻碟, 好典型奶茶式情歌, 曲式比上一次"聽說?"窄了, 不過我都覺得好聽喎

原來2002年之後, 我都冇買過李克勤o既碟。今次都係因為坊間評論令我再投入其懷抱, 的而且確佢唱live係幾得, 如果你唔介意曲式來來去去都差唔多。冇錯, 呢次又係差唔多o既野, 不過今次正在有5.1 dolby o既dvd side, 真係幾正, mp3絕不能夠比擬。

[哈爾移動城堡] - 如果你好喜歡宮崎駿, 請你唔好睇。改篇故事令大師縛手縛腳, 哀哉!

[小企鵝大長征] - 一定要睇廣東話版本, 因為超得意。dvd仲送你靚靚企鵝公仔一隻。

[黑社會] - 杜sir曬料之作。有電影人話想睇一個好導演點樣拍一套好睇o既戲, 睇"槍火", 想睇好導演點樣拍更好o睇既戲, 睇"PTU"。我覺得"黑社會"會係呢句說話o既延續。

[童夢奇緣] - 小朋友如果想變劉德華, 請去公園兜搭亂貌似馮小剛o既流浪漢, 因為佢會俾d藥水你, 你又會好低能地走去用佢, 你第二日就會變成劉德華, 仲有機會返學校溝miss, 之後仲會老死tim喎, 過癮嘛!? 咁sad o既戲竟然係 I 級...痴線ga!!

我和我的塊魂~la~la~la~la~

2005-12-29T01:22:00.000+08:00

唔好意思, 我真係好鍾意滾

仲係要去到邊, 滾到邊, 呢鋪真係爽死!

情癲大聖

2005-12-22T20:09:00.000+08:00

真心講一句對謝霆鋒的喜劇演繹方式不敢恭維, 不過都沒所謂, 反正只是為了"劉鎮偉"三個字而入場。當得悉影片邀得久石讓負責電影配樂就更加滿心歡喜。

本身對謝霆鋒並無任何厭惡感, 不過睇住佢劑眉弄眼咁好努力嘗試去做搞笑表情, 就覺得好難頂。不過對電影整體成績影響不大。至於女主角方面, 蔡卓研演技都開始走入胡同了。全片尚算流暢, 但最後大鬧天宮一段就好兒戲, 想令人感動又嫌太過婆媽。

幸好, 標磅一億港元巨製的特技沒有令人失望(大前提:不要抱太大期望)。末段阿sa變身決戰樹妖一幕基本上99.9%都由電腦特技所拍攝, 而效果卻出奇地討好。同樣憑藉科技發達, 那根死板的金剛棒的戲份都大幅增加, 上天下地樣樣皆能, 真是不得不佩服劉鎮偉的想像力。

作為西遊記最後一部曲, 其"情"的部分便更為惹人注目。誠然, 部分情節仍舊令人有些心動, 但整體感覺就真的不如"西遊記大結局~仙履奇緣"。還記得當年睇完孫悟空咬著香蕉走出城門的一幕, 真係幾奇妙, 因為睇完喜劇但係笑唔出。而"情癲大聖"就沒有這種感動, 但比起英皇電影之前幾部特技片, "情"成績已經明顯比較好。

電影市道低迷, 港片大幅減產, 劉鎮偉近年都只拍了"無限復活"和"天下無雙", 劇情都很悲情。前者大玩時空交錯, 橋段尚算扭得不錯; 後者以喜劇手法去包裝一個悲劇愛情故事, 票房不算理想, 但就奪得2002年香港電影評論學會最佳電影大獎。

情癲大聖最終成績如何就不得而知了。

11月的收穫 (下)

2005-12-01T18:54:00.000+08:00

我好期待<如果愛>, 所以就買左ost, 就係咁。by the way, 幾好聽, 原來閔大人d普通話都ok。

destiny's child出精選, 真係唔講得笑。17首歌都真係好精, 不過當然fans們都會話點解冇呢首冇果首ga? 但係九十蚊唔駛o既價錢已經超值, 仲有bonus dvd, 內容超掂, 又有新歌喎, must buy item!

娜姐又o黎喇! 今次親身示範一隻高質素o既dance album應該係咩樣。睇埋個mv, 真係唔可以唔佩服佢到今時今日仲可以keep得咁fit, 仲係咁索! 強烈建議聽返cd, 因為係non-stop形式, 轉左mp3之後track與track之間可能出現一秒停頓, 勁冇癮!

11月壓軸o既一隻碟。其實我冇乜聽過佢唱歌, 最早plug o既"好人"聽過半首, 之後o既"erica"就未聽過, 係行入cd鋪漫無目的咁游緊o既時候, 岩岩間鋪又播緊, 打死都游耐d啦! 係聽完"命硬"之後就俾左錢喇。

完

11月的收穫 (上)

2005-11-30T18:47:00.000+08:00

行哂成個旺角都冇人識, 去到HMV見到竟然上CHART(真係感謝香港仲有HMV), 真係另人費解。

睇左concert, 就好自然會買埋佢啦。 One of the best in 2005, if not the best.

絕對係中招。robbie williams o既碟我一向係諗都唔諗就會買, 呢次都係, 不過就賴左野囉。之前聽到佢被選為"最成功轉型歌手"已經好寒, 點知聽落真係咁得人驚。本來想買淨cd版本, 點知冇貨, 焗我買埋隻dvd, fxck!

唔係唔好聽, 不過第一次聽就會有d唔知點咁, 可能我太喜歡"反正是我"。不過聽多幾次, 味道就自然出o黎, 好magic!

(待續)

莫名其妙

2005-11-26T00:59:00.000+08:00

我知我有時真係會無意之中得罪人, 不過最低限度都俾我知係因為咩事丫, 無情情俾人討厭真係幾令人不安ga, 仲要同時唔上一個人喎, 死未!?

素質

2005-11-15T20:13:00.000+08:00

[明報即時新聞]國際唱片業協會香港分會將向廿二名利用互聯網涉嫌上下載侵權歌曲的網友進行民事索償，成為全港首宗案例。

該批網友被指利用點對點軟件 WINMX上下載侵權歌曲和音樂達過百首之多，協會是用隨機抽樣方式選出該廿二名網友準備進行民事索償，成為全港首宗的案例。唱片業協會表示，他們已向本港唱片公司籌集200萬元基金，作為訴訟費用，預計向每1名侵權者索償3000歐元(約3萬多港元)。

國際唱片業協會香港分會總裁馮添枝表示，估計訴訟費用將多過取回的補償，但他們為了教育公眾，侵權行為是不合法的，唯有採取法律行動。
--------------------------------------------------------------

唱片公司終於都肯自己出手做返d野, 不過最精彩都係本地各大討論區網友o既反應

有人高呼罷買香港唱片 (我好懷疑佢有冇買過唱片, 無論本地外地)

有人高呼反對唱片公司逼害 (都唔知邊個逼害邊個)

有人高呼廣東歌係垃圾, 淨係聽日文歌 (日本萬歲, 日本人舊屎都好食過人, yummy~)

有人高呼香港歌冇一首好聽, 冇藝術性質 (學人有品味, 學左有品先啦)

有人高呼不如去遊行, 支持罷買正版 (咦, 唔知佢識唔識分黑色同白色呢)

有人高呼唱片公司唔搞合法下載, 逼人去非法下載, 再去告人 (真係冇合法下載網站?? 定係佢自己無知呀)

香港身為一個國際城市, 裡面o既人竟然可以講得出咁冇品既說話, 真係....唉

夜色無邊

2005-11-12T02:07:00.000+08:00

十一月十一日, 晚上八點四十五分, 林憶蓮繼續夜色無邊。

"哭", "愛上一個不回家的人", "傾斜", "祇可活一次", "假如讓你吻下去", "不如重新開始", "依然"...等等經典名曲一律欠奉, 不過現場反應仍然絕佳, 觀乎現場二十到尾, 三十出頭的fans嗌到聲都沙埋, 憶蓮魅力真係沒法擋。

雖然有好多想聽o既都聽唔到, 不過中後段都以招牌快歌為主, 而林憶蓮的快歌永遠都是我o既favorite。隨著節奏舞動, 輪到嘉賓solar出場, 不過只係唱了一首歌(family man), 說話都冇講一句就完左...我都好喜歡solar呀! 中段有倫永亮的純音樂solo, 當好多人好老土地以為係時候去廁所之際, "至少還有你"就失驚無神咁出現, 嚇得眾人o拿o拿臨企返埋位。

encore前o既一連串快歌簡直係精彩, 大部份人都企起身一齊唱, 感覺好好。

"灰色"之後就係encore時間, 亦係點歌時間, 不過d人點果d又係舊到冇譜 -- 真係冇譜, 因為倫永亮一時三刻都搵唔到譜...終於甩甩漏漏都唱左三首, 之後就以一首"瘋了"完場。

演唱會本來都算精彩完成, 但fans總有辦法令結局更完美。就係紅館節目完結廣播響起之際, 有部分人仍高喊encore, encore之聲蔓延至全場, 已準備收拾裝備o既樂手都停哂手......射燈再次點起, 憶蓮要再出o黎唱多首"日與夜", 雖然唔係合唱, 但係已經在場所有人都開心死。

走出紅館, 抬頭望向天際, 雲唔算多, 雖然唔係月圓, 但月色仍稱得上潔靜玲瓏。放眼長空, 也真算是夜色無邊。

八

2005-11-03T23:18:00.000+08:00

我真係一個唔合格o既八公。

識得我o既人都知, 我係好八o既。總之就係好想打聽身邊任何人o既任何芝麻綠豆又唔關自己事o既野。但係我知道左呢d事之後又唔會周圍同人講喎, 無他o既, 懶係有品囉! 不過其實個心就好想同人講 : "阿邊個邊個原來咩咩咩ga!!!!"

所以當我係有意無意之間知道左一D人地唔知o既野, 個心就會唔上唔落咁。就好似最近我請A君幫我一個小忙, 但係A君問左我一個好簡單o既問題之後, 竟然諸多藉口托我手?, 而當我重新諗過我地o既對話, 我就知道左一個會好hurt B君o既秘密。不過我又係冇同人講, 甚至係B君都冇。

過左幾日我個心都仲係唔上唔落, 所以唯有係度寫出o黎啦。

B君, 你死心啦, A君有心避你呀!!!!

至於邊個係B君, 請自己對號入座, 對唔到就唔好問我, 對到都唔好傷心啦

好想你

2005-10-29T02:06:00.000+08:00

都四年了, 仍然不太明白你當時的那句說話, 但我確信我總算比以前成熟了一點點。現在我還是會問自己如果沒有離開過, 結局會否不同。

這四年間的人和事當然也是很寶貴, 但如果可以回到四年之前, 由那一天重來一次, 一句說話也許就能夠挽回一些東西。如果可以這樣交換也很化算吧。

甚至到現在還會夢到當時的事情。夢裡頭一切都是那樣清析, 每個人都是很實在的, 我還可以看到那個又任性又不成熟的自己, 還有那個很愛笑也很愛哭的你。彷彿時間就在夢裡面凝住了。

然後, 夢醒了, 令人窒息的真實都回來了。

無論如何生活還是要過, 我的心在往後的歲月也一定會遭受到更多的磨損, 但我知道我還會一直做那個夢, 因為那是我唯一的方法, 去追逐我最美好的時光。

女人的潛台詞

2005-10-27T00:11:00.000+08:00

"做野緊要嘛, 我唔介意你冇時間陪我ga"
不過若佢想見面時, 你咪又試下唔好出現~

"生日年年都有, 唔好洗埋d無謂錢啦"
買毛公仔就真係幾無謂o既, 不過LV當然另作別論啦

"我唔介意你同你以前女朋友仲有來往"
你唔係信嘛?

"你地一大班男人去玩啦, 我唔去喇"
你夠膽咪跟佢地去囉~

"你去死"
100%冇花冇假, 你去死, 方法自選。

黃偉文 - 俗

2005-10-22T01:01:00.000+08:00

事先聲明, 我係頗喜歡黃偉文。

記得以前中學時代一放學就走返屋企聽收音機 - 叱吒903。果時有邊個年青人會唔聽903, 而好多人就係為左呢條友仔主持o既節目而好似我咁日日準時"捕"係收音機旁邊。主觀d講, 如果果時電影圈最紅o既男主角係劉德華, 咁電台就一定係黃偉文, 至少係年少o既我心目中, 佢係。

淨係"一早發覺髮線向後移而索性將個頭剃光, 都唔想留個地中海獻世"呢個動作已經令我覺得佢好型, 至少好多香港男士冇呢個膽量面對冇頭髮o既自己。大學畢業竟然走去電台搵份分分鐘要倒貼o既工, 仲要俾佢上到位, 真係唔到你唔服, 型爆。

不過自從唔知幾時開始就冇咁鐘意佢, 佢之後再開咪都冇追聽意慾。不過注意係"冇咁"鐘意, 唔係唔鐘意, 所以見到佢出書, 都有種"應該會好睇"o既感覺, 話哂人地近年都為一半o既香港流行曲填詞(另一半係林夕), 文筆都應該有返咁上下。

由於我極度抗拒所有本地八卦雜誌, 所以我係唔知完來佢係東周刊有個專欄, 而呢本書就係呢個專欄輯錄而成。書評我唔識寫, 淨係覺得好"黃偉文", 至於點樣係好"黃偉文"我就真係唔識形容, 不過我真係覺得幾好睇。正如佢係書背所講:

"換你來寫, 或者更好。60元, 未必夠你買兩疊空白A4紙。而A4紙不能陪你坐巴士坐地鐵坐馬桶, 但我可以。"

況且, 八折之後都只係48蚊。

日子有功

2005-10-15T00:13:00.000+08:00

食足一個星期麥記, 終於都食到病喇, yeah~

聽晚仲要亡命OT, yeah~

最過癮就係要俾錢睇醫生, yeah~

IPOD

2005-10-13T23:19:00.000+08:00

咁就out左喇, apple.com冇得賣ga喇, 潮流呢d野真係鬥佢唔過。

不過我都仲係好鐘意我呢部野喎, 始終有種CLASSIC o既感覺...其實我淨係想聽歌, 就係咁簡單就夠。

完美的一天 A Perfect Day

2005-10-11T00:27:00.000+08:00

為何好聽的唱片總是買不完的?

Have A Nice Day

2005-10-10T00:05:00.000+08:00

除左"正", 我都唔知仲可以講咩

拒絕

2005-10-05T22:24:00.000+08:00

拋出一個冷淡的眼神

擺出一個不在乎的態度

吐出一句刺痛人心的說話

無論是真心或假裝

要令人死心也就很足夠了

Farewell to Serena

2005-10-02T20:17:00.000+08:00

FAREWELL PARTY FOR SERENA & ADDY

- 超過三十人出席, 逼爆左間樓上cafe, Serena o既面子真係唔講得笑

- 全場最有心應該係kevin, 佢為左serena竟然努力左兩個星期, 整左個好靚o既哈爾移動城堡

- 真情告白ADDY講到眼濕濕

- 音樂環節請得ANDY哥出手彈結他助慶, 又有大DEE勁好聽o既歌聲, 正爆

- 其實我都真係有D唔捨得

發瘟

2005-09-28T22:20:00.000+08:00

七點半落船, 一出碼頭抬頭見到國金, 忽視之間唔知想點, 感覺好迷失。

我, 究竟想點。

或者係因為三日之內入兩次長洲令我心理有d唔平衡, 又有可能係因為今晚個幾鐘頭o既船程實在漫長, 加上身上只得一部冇電o既IPOD而有太多時間去諗D無謂o野, 又可能諗諗下又發覺自己係過去某一個時候失去左某d野係自己做成, 又可能我其實唔適合搭船, 尤其係慢船。

下次都係搭快船好d。

9 月 20 日 -- 開學日

2005-09-21T00:25:00.000+08:00

朝早入上水圖書館又見到靚姐姐, 著條連身裙仔真係好鬼死正。

晏晝冇咩搞返左公司寫車錢+OT。OT我寫左17個鐘, 力士都話我寫得少, 唯有下次寫多D...

跟住睇下丹尼打下機, 吹下水, 就咁坐到六點走人。唔講唔知, 我都係第一次係公司坐到放工。

跟住就要返學喇...又返學喇...唉...

第一堂都預左悶, 點知真係悶到痴肺, D野FORM 5都學過o既...結果都係睇下雜誌算數, 結果今日都係識唔到新朋友仔。

返到屋企見到個bluetooth adapter死左, 我都想陪佢死埋一份...冇錢果時先o黎壞呢樣壞果樣!!

咪郁! 打劫!

2005-09-17T07:19:00.000+08:00

受害人於2005年9月15日途經荃灣荃豐中心地下, 遭匪徒以一款名為Winning Eleven 9 : Ubiquitous Evolution 的PSP遊戲作為凶器脅持受害人。
受害人沒有選擇之下只好交出港幣319元, 匪徒成功劫去錢財後, 疑因匆忙逃去而遺下凶器

下一站....林憶蓮

2005-09-16T00:59:00.000+08:00

11月11日晚上八時十五分
體驗夜色無邊

很愛孫燕姿

2005-09-11T01:12:00.000+08:00

孫燕姿香港演唱會2005

8點25分, "風箏"為演唱會打開序幕, 隨後的"奔"卻把氣氛正式掀起。

當以半咸淡廣東話把"浪子心聲"唱完之後, 她走到舞台邊緣講了句說話, 由於音樂餘音加上雷動的掌聲關係, 相信在場沒甚麼人聽得清楚她說甚麼, 不過沒關係, 因為大家都聽到那句說話的最後三個發音 -- F. I. R.

舞台昇起, 一曲"無限"令全場尖叫, 之後再來一首"LYDIA", 氣勢一時無倆

例行握手時間之後, 再演繹包括"我的愛"幾首名曲及新歌之後, 好快就到最後的"這一刻"

ENCORE理所當然由"綠光"打開, 好難相信一個如此輕飄飄的孫燕姿, 唱起"綠光"會有一種"重"的感覺。之後全場的人把"天黑黑"最後幾句童謠都唱完之後, 演唱會正式結束。

梁祝下世傳奇

2005-09-10T01:40:00.000+08:00

新一代o既女歌手之中, 我對何韻詩係冇免疫力o既。

所以係咁窮困o既時候都要自動奉獻

慶幸大碟質素仍然keep得住

同埋, d相影得HOCC好靚